Koncert bamirësie në Prishtinë, fitimi nga biletat do të shkojë për fëmijët me diabet tip 1

Një koncert me performancën e këngëtarit Shpat Deda do të organizohet më 14 nëntor në Prishtinë, me qëllim të mbështetjes së fëmijëve që jetojnë me diabet tip 1.Koncerti organizohet nga Tip1Omël, në bashkëpunim me Komunën e Prishtinës, në kuadër të Ditës Botërore të Diabetit.Ngjarja do të mbahet në orën 19:00, në Sallën e Kuqe të Pallatit të Rinisë në Prishtinë.Sipas organizatorëve, i gjithë fitimi nga shitja e biletave do të dedikohet për blerjen e sensorëve të glukozës për fëmijët me diabet tip 1 në Kosovë, me synimin që ata ta menaxhojnë sëmundjen me më shumë siguri.Diabeti tip 1 kërkon kujdes të vazhdueshëm, përfshirë matjen e glukozës dhe marrjen e insulinës. Kostoja e trajtimit, sipas organizatorëve, mbetet sfidë për shumë familje në Kosovë.Biletat mund të blihen online përmes faqes së Rave Travel ose drejtpërdrejt në hyrje të koncertit.Organizatorët u kanë bërë thirrje qytetarëve që t’i bashkohen kësaj mbrëmjeje, ku muzika synon të shndërrohet në mbështetje konkrete për fëmijët me diabet tip 1. /Telegrafi/