Ellen DeGeneres pranon se i mungon televizioni, rikthehet në ekran pas skandalit të ngacmimit

Ellen DeGeneres ka habitur shikuesit me paraqitjen e saj në emisionin e Graham Norton, ku foli për jetën larg ekranit dhe pranoi se i mungon puna në televizion, ndonëse aktualisht nuk ka projekte të reja në plan.Prezantuesja 68-vjeçare u tërhoq nga televizioni pas përfundimit të emisionit të saj në vitin 2022, në një periudhë kur dolën akuza nga ish-punonjësit për një ambient toksik pune dhe sjellje të papërshtatshme. Që atëherë, ajo ka jetuar në Cotswolds të Anglisë me bashkëshorten e saj, Portia de Rossi, shkruan DailyMail. Gjatë intervistës, Ellen tregoi se i mungojnë humori, bashkëpunimi me skenaristët dhe ndërveprimi me publikun. Ajo la të kuptohej se mund të shqyrtojë mundësi të reja në televizionin britanik, por nuk zbuloi ndonjë projekt konkret. Ajo foli gjithashtu për rëndësinë e sitcom-it të saj, përmes të cilit personazhi që interpretonte u bë një nga personazhet e para kryesore homoseksuale të hapura në një serial amerikan. Ellen tha se ishte veçanërisht domethënëse për të që kjo arritje të vlerësohej në Londër, pas reagimeve negative që kishte përjetuar në SHBA.Megjithatë, rikthimi i saj në ekran shkaktoi reagime të përziera në rrjetet sociale. Disa shikues vunë në pikëpyetje arsyen e ftesës, pasi ajo nuk po promovonte ndonjë projekt të ri. Reputacioni i saj ishte dëmtuar pas raportimeve të vitit 2020 për akuza mbi një mjedis problematik pune në emisionin e saj, çështje që çuan në një hetim të brendshëm. /Telegrafi/