Papa Leo operohet për kancer në mushkëri, mjekët nuk dinë nëse është përhapur sëmundja

Papa Leo XIV pritet të dalë nga spitali të shtunën pasdite, pas një operacioni për kancer në mushkëri. Analizat e gjakut dhe incizimet e kraharorit kanë treguar se gjendja e tij shëndetësore është mjaftueshëm e mirë për t’u kthyer në shtëpi, njoftoi Vatikani.Të dielën, Papa do të drejtojë lutjen për pelegrinët e mbledhur në Sheshin e Shën Pjetrit, nga dhomat e tij në Vatikan. Kjo do të jetë paraqitja e tij e parë publike që nga shtrimi në spital.Papës 71-vjeçar i është diagnostikuar adenokarcinoma e mushkërive, një nga format më të shpeshta të kancerit të këtij organi. Gjatë operacionit të kryer të martën në spitalin Gemelli në Romë, mjekët ia hoqën lobin e poshtëm të mushkërisë së djathtë.Ekipi mjekësor bëri të ditur se ndërhyrja kirurgjikale përfundoi me sukses dhe pa komplikime. Megjithatë, ende nuk janë publikuar të dhëna për madhësinë e tumorit apo nëse sëmundja është përhapur në nyjet limfatike përreth, elemente që janë të rëndësishme për përcaktimin e prognozës.Diagnoza ka shkaktuar shqetësim, pasi Papa konsiderohet relativisht i ri dhe energjik. Ai u zgjodh në krye të Kishës Katolike në maj të vitit 2025, ndërsa sëmundja ka ngritur pikëpyetje për vazhdimësinë e angazhimeve të tij gjatë pontifikatit. /Telegrafi/