Zvicra mbështet Kosovën në hartimin e Vizionit Hapësinor 2050 për zhvillimin e qyteteve

Zvicra ka shprehur mbështetjen për Kosovën në procesin e hartimit të Vizionit Hapësinor 2050, i cili synon të orientojë zhvillimin afatgjatë hapësinor të vendit. Përmes një postimi në Facebook, Ambasada e Zvicrës në Kosovë ka theksuar rëndësinë e një vizioni të qartë afatgjatë për zhvillimin e balancuar, forcimin e qëndrueshmërisë ndaj ndryshimeve klimatike dhe përmirësimin e ndërlidhjes. “Zvicra është krenare që mbështet Kosovën në hartimin e Vizionit Hapësinor 2050”, thuhet në postimin e Ambasadës, shkruan Telegrafi.Sipas Ambasadës, një planifikim i mirëfilltë hapësinor ndihmon edhe në rritjen e cilësisë së jetës për qytetarët në të gjithë vendin. Ambasada ka bërë të ditur se do të vazhdojë të mbështesë përpjekjet e Kosovës për krijimin e qyteteve më të përshtatshme për jetesë dhe më të qëndrueshme. “Ne mbetemi të përkushtuar për të mbështetur përpjekjet e Kosovës për të ndërtuar qytete më të jetueshme, më të qëndrueshme dhe të planifikuara më mirë për gjeneratat e ardhshme”, thuhet në postim. Vizioni Hapësinor 2050 përmendet në njoftimin e Ambasadës si një orientim afatgjatë për zhvillimin e vendit, me rëndësi për planifikimin e qyteteve dhe përmirësimin e kushteve të jetesës për gjeneratat e ardhshme./Telegrafi/