Termokos nis sezonin e ngrohjes më 15 tetor, mbi 25 mijë konsumatorë përfitojnë nga furnizimi

Ndërmarrja Publike “Termokos” ka njoftuar se janë përmbushur të gjitha kushtet për fillimin e sezonit të ngrohjes 2026/2027 në Prishtinë. Furnizimi me ngrohje për mbi 25 mijë konsumatorë të kyçur në rrjet do të nisë zyrtarisht më 15 tetor.Sipas njoftimit të ndërmarrjes, përgatitjet për sezonin e ri janë përfunduar, ndërsa është nënshkruar edhe marrëveshja për furnizim me energji me Korporatën Energjetike të Kosovës (KEK).Termokos ka bërë të ditur se furnizimi me ngrohje do të nisë fillimisht me kapacitet të kufizuar dhe do të rritet gradualisht, me qëllim të garantimit të sigurisë së pajisjeve dhe stabilizimit të plotë të sistemit.Fillimi i sezonit të ri është konfirmuar pas vlerësimit të përgatitjeve nga kryeshefi ekzekutiv i ndërmarrjes, Bersant Beka, në bashkëpunim me menaxhmentin dhe stafin e Termokosit. /Telegrafi/