Policia turke bastis televizionin e pavarur, ndërpritet transmetimi i drejtpërdrejtë

Një operacion policor është zhvilluar sot në selinë e televizionit Halk TV në Stamboll, ku autoritetet kanë marrë nën kontroll administrimin e mediumit pranë opozitës turke dhe kanë ndërprerë transmetimin e drejtpërdrejtë të programit.“Policia ndodhet brenda ndërtesës së Halk TV. Është emëruar një komisioner për të marrë përsipër administrimin e televizionit. Transmetimet e drejtpërdrejta janë ndërprerë”, njoftoi televizioni përmes një deklarate të publikuar në platformën X.Pamjet e shpërndara në rrjetet sociale tregojnë punonjësit e Halk TV-së të mbledhur jashtë ndërtesës, ndërsa policia ua pamundëson hyrjen në ambientet e televizionit. Në një tjetër video shihet momenti kur programi ndërpritet papritur. Sipas mediave turke, policia hyri në ndërtesë rreth orës 05:30 të mëngjesit dhe kreu kontrolle, ndërsa rruga përpara selisë së televizionit u bllokua.Drejtori i përgjithshëm i lajmeve në Halk TV, Suat Toktas, u përpoq të siguronte vazhdimin e transmetimit duke kontaktuar personin e emëruar për të administruar televizionin, por përpjekja e tij dështoi.Ngjarja shkaktoi reagime në Turqi, ku përfaqësues të opozitës e dënuan ndërhyrjen, duke e cilësuar atë si goditje ndaj lirisë së shtypit. /Telegrafi/