Milioner në Zvicër, por ndihet i varfër në Cyrih, ky është rrëfimi i Christian Wolfit

Edhe pse është multimilioner, sipërmarrësi dhe influencuesi gjerman Christian Wolf thotë se në Cyrih mund të ndihet i varfër, për shkak të kostos së lartë të jetesës dhe pasurisë së madhe që kanë disa prej njerëzve në këtë qytet. Wolf, i njohur si bashkëthemelues i markës së suplementeve ushqimore More Nutrition, ka krijuar një pasuri të konsiderueshme përmes biznesit dhe investimeve. Në mars të vitit 2026, ai deklaroi në podcastin “Beyond Business Cast” se pasuria e tij arrin rreth 100 milionë euro. Megjithatë, shuma e tillë nuk do të thotë se e gjithë pasuria gjendet në llogaritë e tij bankare. Një pjesë e konsiderueshme e saj është e investuar në kompani dhe prona të paluajtshme, shkruan 20Minuten, transmeton Telegrafi. Cyrihu njihet si një nga qytetet me koston më të lartë të jetesës në Evropë dhe është shtëpi e shumë drejtuesve të lartë të kompanive, bankierëve dhe individëve me pasuri të mëdha. Në këtë ambient, edhe personat me të ardhura dhe pasuri shumë të larta mund ta krahasojnë veten me njerëz që zotërojnë pasuri edhe më të mëdha. Rasti i Wolfit rikthen në vëmendje dallimin mes të qenit i pasur dhe mënyrës se si një person e percepton pasurinë e vet, veçanërisht në qytete ku standardi i jetesës dhe fuqia ekonomike janë shumë të larta./Telegrafi/