Aksidentohet një 23-vjeçar në kantonin Graubünden të Zvicrës, përplaset me shenjën e trafikut

Një 23-vjeçar është lënduar në një aksident trafiku të ndodhur në Luzisteigstrasse, në kantonin Graubünden të Zvicrës.Aksidenti ka ndodhur rreth orës 17:20, teksa 23-vjeçari po drejtonte makinën nga Maienfeld në drejtim të Landquartit.Pak më pak se një kilometër pas kthesës për në Jenins, i riu ka nisur një manovër parakalimi. Në atë pjesë, korsia e kundërt ishte e mbyllur për shkak të një ngjarjeje lokale në drejtim të Maienfeldit, raporton Blick.Gjatë manovrës, automjeti u përplas me një tabelë të ndalimit të hyrjes, e cila ishte vendosur në korsinë e kundërt, dhe më pas u rrëzua.Dy ekipe të ambulancës nga shërbimi i shpëtimit në Chur, të cilat po ktheheshin nga një tjetër ndërhyrje, mbërritën në vendin e aksidentit para shërbimit të shpëtimit nga Schiers, transmeton Telegrafi.Së bashku, ekipet e shpëtimit i dhanë ndihmën e parë personit të lënduar dhe më pas e transportuan atë në spitalin në Schiers.Policia Kantonale e Graubündenit ka nisur hetimet për të përcaktuar shkakun e saktë të aksidentit./Telegrafi/