Gjykata amerikane bllokon përkohësisht ndërtimin e murit kufitar me Meksikën

Një gjykatë federale në Teksas ka urdhëruar pezullimin e përkohshëm të ndërtimit të murit kufitar dhe infrastrukturës së lidhur me të në rajonin Big Bend, përgjatë kufirit SHBA-Meksikë.Vendimi i gjyqtares Kathleen Cardone ndalon ndërtimet dhe ndërhyrjet në terren në këtë zonë, përfshirë Parkun Kombëtar Big Bend, derisa autoritetet të respektojnë ligjet federale përkatëse.Projekti është pjesë e planit të administratës së presidentit Donald Trump për forcimin e kufirit jugor, me një fond prej rreth 46 miliardë dollarësh. Plani parashikon mure prej çeliku deri në rreth nëntë metra lartësi, barriera për automjete, rrugë dhe sisteme të mbikëqyrjes. Padia u ngrit nga organizata mjedisore Center for Biological Diversity, Friends of the Ruidosa Church dhe një pronar toke e udhërrëfyes lumi. Paditësit kundërshtuan vendimet e Departamentit të Sigurisë Kombëtare për të anashkaluar disa ligje dhe rregulla mjedisore me qëllim përshpejtimin e punimeve.Gjyqtarja Cardone vlerësoi se paditësit kanë gjasa të fitojnë të paktën një pjesë të çështjes dhe se pa urdhrin e pezullimit mund të pësonin dëme serioze dhe të pakthyeshme.Ndërtimi në rajonin Big Bend kishte nisur të merrte formë gjatë muajve të fundit. Në shtator u vendosën panelet e para të murit, ndërsa më herët ishin hapur edhe rrugë të reja në zonë. Punimet kanë shkaktuar kundërshtime nga banorë, pronarë tokash dhe grupe mjedisore, ndërsa çështja ka marrë mbështetje dhe kundërshtime nga politikanë të të dyja partive amerikane.Agjencia amerikane për Doganat dhe Mbrojtjen e Kufirit (CBP) ka mbrojtur projektin, duke deklaruar se qëllimi është forcimi i sigurisë kufitare duke ruajtur njëkohësisht peizazhin e veçantë të rajonit.Vendimi i gjykatës është i përkohshëm dhe çështja do të vazhdojë të shqyrtohet në gjykatë. /Telegrafi/