Taravari: VLEN-i të mbështes Jahijin në raundin e dytë të zgjedhjeve në Bërvenicë

Kryetari i Aleancës për Shqiptarët, Arben Taravari i ka bërë publikisht ftesë VLEN-it që në raundin e dytë të zgjedhjeve ta mbështesë kandidatin e Aleancës Kombëtare për Integrim (AKI), Arkin Jahijin.Taravari, sonte në emisionin “Debat në Shenja”, tha se Aleanca për Shqiptarët është e gatshme të angazhohet aktivisht në mbështetje të Jahijit, duke propozuar që në raundin e dytë të mos ketë banderola partiake dhe fushata të ndara.“Ja, unë publikisht e ftoj VLEN-in. Arkini sigurisht do të shkojë në raundin e dytë. Publikisht e ftoj VLEN-in që ne të gjithë t’i heqim banderolat e Aleancës Kombëtare për Integrim dhe të kyçemi aktivisht, sikur ne që ishim vitin e kaluar në mbështetje të Haqim Ramadanit. Ne jemi të gatshëm që në raundin e dytë të mos ketë banderolë partiake. Komplet të fokusohemi ta përkrahim Arkin Jahijun dhe komuna të udhëhiqet prej një kuadri që ka përvojë institucionale”, deklaroi Taravari.Taravari foli edhe për takimin e tij me kryetarin e BDI-së, Ali Ahmeti.“Po, përafërsisht para një jave apo 10 ditësh ka pasur një takim të kryesive të ngushta mes Aleancës për Shqiptarët dhe BDI-së, në të cilin i koordinuam aktivitetet për zgjedhjet lokale që do të mbahen në Bërvenicë. Praktikisht, ishte një bisedë konstruktive, në të cilën diskutuam çështjet rreth organizimit”, deklaroi Taravari.Ai tha se rezultatet e deritanishme të zgjedhjeve të vitit 2026, sipas tij, kanë nisur me sukses për Aleancën Kombëtare për Integrim, duke iu referuar zgjedhjeve të 11 janarit në Gostivar dhe Vrapçisht.