Djemtë e ish-krerëve të UÇK-së vizitojnë familjen e policit Afrim Bunjaku

Endrit Thaçi, Klestor Veseli dhe Altin Krasniqi, djemtë e ish-krerëve të UÇK-së, kanë vizituar sot familjen e policit të Kosovës, Afrim Bunjaku, i cili u vra në krye të detyrës gjatë sulmit në Banjskë.Vizita është zhvilluar në shenjë respekti dhe solidariteti me familjen Bunjaku, në përvjetorin e rënies së policit të Kosovës. Gjatë vizitës, ata kanë shprehur respektin e tyre për figurën dhe sakrificën e Afrim Bunjakut, duke qëndruar pranë familjes së tij në këtë ditë përkujtimi.Në bisedë e sipër me familjarët e heroit Afrim Bunjaku, djali i Kadri Veselit, Klestor Veseli tha se familja Bunjaku e di shumë mirë se çka është me kontribu për vendin edhe pas 27 vjetëve liri.“E keni jep një djalë, një vlla e prind për atë duhet me kon gjithë Kosova mirënjohës për shërbimin e tij dhe i përjetshëm ka me mbet kujtimi i tij. Me emër të zotit e kur t'i lëshojnë ata vetë kanë me ardhë me ju pa juve”,tha Klestor Veseli.Ndër të tjerash njëri nga familjarët e Afrim Bunjakut deklaroi se ish-presidenti Hashim Thaçi kishte thirrur në telefon nga Haga.“Prezent s’ka mujt me qenë, por në telefon ka thirrë presidenti prej atje”, deklaroi vëllai i Afrim Bunjakut. Rreshteri policor, Afrim Bunjaku u vra më 24 shtator 2023 në Banjskë të Zveçanit, gjatë agresionit të Serbisë, derisa ishte në krye të detyrës si pjesëtar i Policisë së Kosovës. Familja e tij vazhdon ta përkujtojë me krenari dhe dhimbje. /Telegrafi/