Barcelona futet sërish në borxh për ‘Camp Nou’, Laporta kërkon 300 milionë euro

Presidenti i Barcelonës, Joan Laporta, ka shpjeguar nevojën për një kredi të re prej 300 milionë eurosh për të përshpejtuar punimet për rinovimin e 'Spotify Camp Nou', gjatë Asamblesë së Përgjithshme të Zakonshme të klubit.“Vitin e ardhshëm presim të arrijmë në 1.195 miliardë euro. Përfundimi i 'Spotify Camp Nou' është thelbësor për rritjen. Do të jetë diçka që nuk është parë kurrë më parë në historinë e Barcelonës”, deklaroi Laporta.“Do të jetë epiqendra e Barçës. Është një burim i paprecedentë të ardhurash të mëdha. Erdhi një moment kur, nga prilli i vitit 2023 e tutje, pati vonesa në punime dhe rritje të kostove”.“Kontrata fillestare përfshinte 800 ndërhyrje, ndërsa në fund numri arriti në 3,000 ndërmjet katit të parë dhe të dytë”. “Jemi përballur me kosto shtesë për materialet, si pasojë e konflikteve të armatosura. Gjithçka ka ndikuar në punime”. “Pamundësia për t’u rikthyer në 'Spotify Camp Nou' dhe detyrimi për të luajtur në Montjuic kanë bërë që të paguajmë edhe qira”.“Sot po kërkojmë autorizim për të përditësuar financimin e Espai Barça me 300 milionë euro. Kjo nuk ndikon në llogaritë e klubit apo në politikën sportive. Këto para janë për të përfunduar Spotify Camp Nou dhe për të përshpejtuar gjenerimin e të ardhurave”, tha Laporta./Telegrafi/